မြန်မာ့အရေး ထိရောက်စွာ ဖြေရှင်းပေးဖို အာစီယံ ကို ကန်ဝန်ကြီး ထပ်မံတောင်းဆို

မြန်မာနိုင်ငံမှာ စစ်အာဏာသိမ်းပြီးနောက်ပိုင်း နိုင်ငံရေး အကျပ်အတည်းတွေကို အရှေ့တောင်အာရှ နိုင်ငံများအသင်း (ASEAN) ခေါင်းဆောင်တွေ ဖြေရှင်းဖို့ အမေရိကန်က ထပ်မံတိုက်တွန်းလိုက်ပါတယ်။

ဒီမိုကရေစီ အသွင်ကူးပြောင်းရေး ပြန်လုပ်ဖို့နဲ့ မတရားဖမ်းဆီးထားသူတွေကို ပြန်လွှတ်ပေးဖို့ မြန်မာစစ်တပ်ကို တောင်းဆိုဖို့လည်း အာဆီယံခေါင်းဆောင်တွေနဲ့ ဒီသီတင်းပတ်ထဲ တွေ့ဆုံရာမှာ တိုက်တွန်းထားတဲ့အကြောင်း ကြာသပတေးနေ့က မဲခေါင်ဒေသနိုင်ငံတွေနဲ့ အွန်လိုင်းတွေ့ဆုံအပြီး ထုတ်ပြန်တဲ့ ကြေညာချက်မှာ အမေရိကန် နိုင်ငံခြားရေးဝန်ကြီး Antony Blinken ကပြောဆိုခဲ့တာပါ။

မြန်မာနိုင်ငံဆိုင်ရာ အာဆီယံ အထူးကိုယ်စားလှယ်အဖြစ် ဘရူနိုင်း ဒုတိယနိုင်ငံခြားရေးဝန်ကြီး Erywan Yusof ကို တာဝန်ပေးလိုက်တဲ့အပေါ် ကြိုဆိုကြောင်း ပြောဆိုခဲ့ပေမဲ့ အထူးကိုယ်စားလှယ်နဲ့ အာဆီယံအသင်းဝင်တွေ အနေနဲ့ အာဆီယံ ဘုံသဘောတူညီချက် ၅ ခုကို မြန်မာစစ်တပ်က တာဝန်ယူမှု၊ တာဝန်ခံမှုရှိဖို့နဲ့ ဒီမိုကရေစီ ခေါင်းဆောင်တွေ အပါအဝင် သက်ဆိုင်သူတွေနဲ့ ထိတွေ့ဆက်ဆံမှုတွေကိုလည်း အမြန်ဆုံးဆောင်ရွက်ဖို့လည်း ဝန်ကြီးဘလင်ကင်က တိုက်တွန်းထားပါတယ်။

မြန်မာနိုင်ငံမှာ ဖေဖော်ဝါရီလ ၁ ရက်နေ့ စစ်တပ်က အာဏာသိမ်းလိုက်ပြီးနောက် နိုင်ငံရေး အကျပ်အတည်းတွေ ပေါ်ပေါက်နေတာကို ကူညီဖြေရှင်းပေးဖို့ အာဆီယံက ဗုဒ္ဓဟူးနေ့မှာ အထူးကိုယ်စားလှယ် ခန့်အပ်တာဝန်ပေးလိုက်တဲ့ အပေါ်မှာတော့ အမေရိကန်၊ ဥရောပသမဂ္ဂ (EU) နဲ့ ကုလသမဂ္ဂ အတွင်းရေးမှူးချုပ် အပါအဝင် နိုင်ငံတကာ အသိုင်းအဝန်းနဲ့ ဒေသတွင်း နိုင်ငံတွေက ကြိုဆိုခဲ့ကြပေမဲ့ အထူးကိုယ်စားလှယ်ရဲ့ လုပ်ငန်းတွေမှာ ပူးပေါင်း ဆောင်ရွက်ဖို့ နိုင်ငံတွင်းမှာ လွတ်လပ်စွာ သွားလာလှုပ်ရှားခွင့် ပြုဖို့လည်း မြန်မာစစ်အာဏာပိုင်တွေကို တိုက်တွန်းထားပါတယ်။