နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကျန်းမာရေး မကောင်း လို့ ဒီကနေ့ ရုံးချိန်းကို မစစ်ဖြစ်

ရုံးပိတ်ရက် တွေကြောင့် အမှုတွေကို နှစ်လကျော်ကြာ စစ်ဆေးနိုင်ခြင်း မရှိခဲ့တဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် သမ္မတဦးဝင်းမြင့် နဲ့ နေပြည်တော် ကောင်စီဥက္ကဋ္ဌ ဒေါက်တာမျိုးအောင် တို့ စွဲဆိုခံထားရတဲ့ အမှုတွေကို

ဒီကနေ့ စက်တင်ဘာ ၁၃ရက်မှာ ပြန်လည်စစ်ဆေးဖို့ ချိန်းဆိုပေမယ့် ဒေါ်အောင်ဆန်းစုကြည် ကျန်းမာရေးမကောင်းလို့ မနက်ဖြန် စက်တင်ဘာ ၁၄ ရက်မှာ ထပ်မံစစ်ဆေးဖို့ရှိနေပါတယ်။

“ခေါင်းမူးတယ်ပြောတယ် နှာနည်းနည်းမွှန်တယ်။ သူ ဒီနေ့တော့လုံးဝမထိုင်နိုင်လို့ မနက်ဖြန်ကျမှ တွေ့ဖို့ပြောတယ်။ သူပြောတာကတော့ ကားနဲ့လာရတာ ကားက အရမ်းခါတယ်ပြောတယ်။

သူမူးနေတယ်လို့ ပြောပါတယ်။ ကိုဗစ်တော့မဟုတ်ဘူး။ အခုမနက်မှထဖြစ်တယ်လို့ သူကပြောပါတယ်” လို့ ဒေါ်အောင်ဆန်းစုကြည်ရဲ့ ရှေ့နေ ဦးခင်မောင်ဇော်က ဘီဘီစီကိုပြောပါတယ်။

ရှေ့နေ့အဖွဲ့ ရဲ့ပြောကြားချက်အရ ဒီကနေ့ အထူးတရားရုံးကို ဝင်ရောက်ရမယ့်သူ အားလုံးဟာ မနေ့ကစက်တင်ဘာ ၁၂ရက် နေ့လည်ပိုင်းမှာ ကိုဗစ်စစ်ဆေးမှုကို ခံယူထားရပြီး ကိုဗစ်နဂ္ဂတစ် ဖြစ်တဲ့သူတွေသာ ဒီကနေ့ ရုံးထုတ်စစ်ဆေးမှုကို ဝင်ရောက်ခွင့် ရတာဖြစ်ပါတယ်။

မနက်ဖြန် အင်္ဂါ စက်တင်ဘာ ၁၄ရက်မှာတော့ ပုံမှန်စစ်ဆေးနေကြရုံးချိန်းဆက်ရှိမှာဖြစ်ပါတယ်။

Ref: ဘီဘီစီမြန်မာပိုင်း

Add a Comment

Your email address will not be published. Required fields are marked *