လင်မယားဆိုတာ တစ်ယောက် ကို တစ်ယောက် ကျေးဇူး ရှိတယ်

ယောက်ျား ယူပီးမှ အမျိုးသမီးက အပျိုတုန်းကထက် ပိုလှနေတယ် ၊ ပိုပီးတင့်တယ်နေတယ် ဆိုရင် အဲဒီ အမျိုးသမီးဟာ လင်ကောင်းကို ပိုင်ဆိုင်ထားရလို့ လို့ ဆိုကြတယ် ။ အိမ်ထောင်ကျပြီးမှ ခင်ပွန်းဖြစ်သူ အမျိုးသားဟာ လူပျို ဘဝတုန်းကထက် ပိုပြီး ခန့် ညား တင့်တယ်နေတယ် ဆိုရင် သူဟာ ဇနီးကောင်းကို ရရှိထားလို့ လို့ ဆိုကြပါတယ် ။

အပျို လူပျို ဘဝမှာထက် ပိုပြီး တင့်တယ်နေတဲ့ ဇနီးမောင်နှံတွေ ကတော့ ရှေးရေစက်ကြောင့် ဆုံရတဲ့ စုံတွဲ၊ ကောင်းမှု ကုသိုလ် အတူတူပြုဖို့ နတ်ဖက်တဲ့ အတွဲ လို့လည်း ဆိုကြ ပြန်တယ် ။ အဲဒီ အဆိုတွေကို နားလည် လက်ခံမိပါတယ် ။ အများစု ကတော့ လူပျို၊အပျိုဘဝတုန်းက မိဘရဲ့အရိပ်အောက်မှာ နေရစဉ်တုန်းက လောကဓံကို ကြုံရပေမဲ့ မိဘရဲ့အမိုးအကာအောက်မှာ ရှိနေတဲ့အတွက် မပြင်းထန် လှပါဘူး ။

ကိုယ့်အိမ်ထောင် ကိုယ့်မိသားစုနဲ့ ဖြစ်လာချိန်မှာ ကောင်းကောင်းဆိုးဆိုး လောကဓံ နှစ်မျိုးစလုံးကို ကိုယ်တိုင်ကိုယ်ကျ ကြုံပြီး ရင်ဆိုင်ဖြတ်သန်း ကြရပါပြီ ။ အဲဒီလို ကာလမှာ ကိုယ်လက်တွဲခွင့် ရထားတဲ့ အိမ်ထောင်ဘက်ရဲ့ အရည်အသွေးဟာလည်း ပေါ်လွင်ထင်ရှားလာ တတ်ပါတယ် ။ ကိုယ်က နိမ့်ပါးနေချိန်မှာ ကိုယ့်ကို ထားပြီး အငယ်နောက် လိုက်သွားတဲ့ သူတွေ၊ ကိုယ့်ရဲ့ မရှိမဲ့ရှိမဲ့ ပိုက်ဆံလေးကို ယူပြီး ကိုယ့်ကိုတော့ ထားပစ်ခဲ့ပြီး ထွက်ပြေးသွားတဲ့ သူတွေ၊ စိတ်ဆင်းရဲပြီး စိတ်ဓါတ်ကျနေတဲ့ကိုယ့်ကို မသိချင်ယောင် ဆောင်ပြီး ပစ်ထားတဲ့ သူတွေကို ဆင်းရဲချိန်၊ နိမ့် ပါးချိန်၊ ဒုက္ခရောက်ချိန် မှာ တွေ့ရတော့ တာ ပါပဲ ။

အဲလို အိမ်ထောင်ဘက်မျိုးနဲ့ ကြုံရတဲ့ အမျိုးသား၊ အမျိုးသမီးတွေဟာ အိမ်ထောင်ကျပြီး နောက်မှာ ခြုံးခြုံးကျ ကြရတဲ့ ရုပ်သွင်နဲ့ သွင်ပြင် ဖြစ်ကုန် ကြတယ်။ သူတို့ရဲ့ မရွှင်မလန်းတဲ့ မျက်နှာနဲ့ ညှိုးငယ်တဲ့ အသွင်က သူတို့ ရရှိထားတဲ့ အိမ်ထောင်ဘက်တွေရဲ့ ကိုယ်ရည်ကိုယ်သွေးကို ပြသနေကြ ပါတယ် ။ နောက်တမျိုးကတော့ သူဘယ်လောက်ကောင်းသလဲ ဆိုတာကို ကိုယ်တကယ်ဒုက္ခရောက်ချိန်မှာ ပိုပြီး သိလာရတဲ့သူမျိုးပါ ။

ကိုယ် အဆင်မပြေလို့ ဒုက္ခရောက်နေချိန်မှာ နားလည်စွာနဲ့ ဘေးကနေရှိပြီး ရင်ဆိုင်ပေးတတ်သလို ၊ မိသားစုအတွက် လိုအပ်ရင် ရှေ့ကထွက်ပြီး တံတိုင်းကြီးလို ကာကွယ်ပေးတယ် ။ အသေးစား စိတ်ဖိစီးမှုပဲ ဖြစ်ဖြစ် အကြီးစား စိတ်ဖိစီးမှုတွေကိုပဲ ဖြစ်ဖြစ် ကိုယ့်ရဲ့စိတ်ပိုင်းဆိုင်ရာကိုလည်း အားပေးနှစ်သိမ့်ရင်းနဲ့ကိုယ်နဲ့အတူတူ ဖြေရှင်းရင်ဆိုင်ပေးတယ် ။ အဲဒီလိုမျိုး အိမ်ထောင်ဘက်ကောင်းကို ပိုင်ဆိုင်ထားတဲ့ သူတွေကတော့ မြင်ရတာနဲ့တင် သိသာစေတယ် ။

ရွှင်လန်းတယ်၊ ကျေနပ်နှစ်သိမ့်မှု ရှိနေတဲ့ အပြုံးတွေနဲ့ လှုပ်ရှားမှုတွေနဲ့ သက်ဝင်နေတယ် ။ စိတ်ပိုင်းဆိုင်ရာ ကျေနပ်မှု ရှိနေတဲ့အတွက် လုံခြုံမှုတစ်ခုကို ရရှိထားတဲ့သူတစ်ဦးရဲ့ အသွင်မျိုးနဲ့ တွေ့မြင်ရပါတယ် ။ အဲဒီလိုမျိုး အိမ်ထောင်ဘက်ကောင်း ရရှိထားတဲ့ သူတွေပဲ ဖြစ်ဖြစ်၊ အိမ်ထောင်ဘက်ဆိုးနဲ့ ရေစက်ဆုံနေရတဲက သူတွေပဲဖြစ်ဖြစ် အားလုံးကတော့ ဇနီးမောင်နှံတွေဖြစ်ကြပြီ ဆိုကတည်းက အတိတ်ဘဝတုန်းက ကုသိုလ်၊ အကုသိုလ် အတူတူ ပြုဖူးခဲ့တဲ့သူတွေပါ။

ဒါကြောင့် ကိုယ့်ရဲ့ အိမ်ထောင်ဘက်တွေ အပေါ်မှာ တန်ဖိုးထားသင့်တယ် ။ သူ့နဲ့ကိုယ်နဲ့ ရေစက်ရှိလို့သာ ဆုံခဲ့ရတယ် ။ ဒါပေမဲ့ အချို့ကတော့ ရေစက်တွေကလည်း တိုတောင်းတတ် ပါသေးတယ် ။ ဘဝရေးမှာပဲ ဖြစ်ဖြစ် အိမ်ထောင်ရေးမှာပဲ ဖြစ်ဖြစ် ကုသိုလ်၊ အကုသိုလ် မတူတဲ့ သူတွေကလည်း ကြာကြာအတူ ပေါင်းသင်းနေထိုင်လို့ မရပါဘူး ။ ဆိုပါတော့ အိမ်ထောင်ရှင်မက ကောင်းပါလျက်နဲ့ ဇနီးသည်အပေါ် ဖောက်ပြန်တတ်တဲ့ ခင်ပွန်းမျိုး ရှိနေတယ်ဆိုရင် သူနဲ့ကိုယ်က အကျင့်သီလမှာ မတူတော့ပါဘူး ။

မတူတဲ့ အတွဲတွေမှာ တစ်ယောက်က ကောင်းပြီး တစ်ယောက်က မကောင်းတဲ့အတွက် ကုသိုလ်၊ အကုသိုလ်တွေကလည်း မတူနိုင်တော့ဘူး။ ဒါကြောင့် မကောင်းတဲ့သူဟာ ကောင်းတဲ့သူ နားမှာ မနေနိုင်လို့ မကောင်းတဲ့သူ အချင်းချင်း သွားပေါင်းကြတာပါ ။ ဒီသဘောတရားကို နားလည်လက်ခံမယ် ဆိုရင် ကိုယ့်နားမှာ အကုသိုလ် မကင်းတဲ့သူတွေ ကိုယ့်နားမှာ မနေနိုင်ကြတာ ကိုယ့်အတွက် ကောင်းတယ်လို့လည်း မှတ်ယူလို့ရပါသေးတယ် ။

တကယ်တော့ ဇနီးမောင်နှံ နှစ်ယောက် ၊ တယောက်က ကုသိုလ်ပဲ ပြုပြု ၊ အကုသိုလ်ပဲ လုပ်လုပ် ၊ ကျန်တဲ့ တစ်ယောက်က စိတ်တူ (စိတ်ပါ) မှ ရနိုင်တယ်။ စိတ်မတူရင် မရဘူး။ ပြုလုပ်သူသာလျှင် ရတယ်လို့ ဘာသာရေးအရ မှတ်သားခဲ့ဖူးတယ် ။ ပြီးတော့ မှတ်သားမိတာလေးလည်း ရှိသေးတယ် ။

မောင်ပုဏ္ဏဟာ တောထဲမှာ လယ်ယာတွေကို တစ်ယောက်တည်း၊ ဆင်းရဲပင်ပန်းစွာ လုပ်ကိုင်နေရတယ် ။ တရက်တော့ နံနက် ၁၁ နာရီလောက်ထိ ထမင်းမစားရသေးဘူး ။ ဘာဖြစ်လို့လဲ ဆိုတော့ အိမ်က ဇနီးက ထမင်းလာ မပို့သေးလို့ ဖြစ်တယ် ။ လူ့ သဘော သဘာဝက ဆာနေတဲ့အချိန် မစားရရင် အလွန် ဒေါသဖြစ်တတ်တယ်။

မောင်ပုဏ္ဏမှာလည်း နေကပူ၊ အလုပ်ကပင်ပန်း ၊ ဗိုက်ကဆာ ထမင်းက ရောက်မလာသေး ၊ ဘယ်လောက် စိတ်တိုစရာ ကောင်းသလဲ ဆိုတာ စဉ်းစားကြည့်ပေတော့ ။ ဟော.. နေပူကြဲကြဲ ချွေးရွှဲရွှဲနဲ့ ထမင်းထုပ် ခေါင်းပေါ် ရွက်ပြီး ၊ ခြေလှမ်းသွက်သွက်နဲ့ လာနေတဲ့ ဇနီးသည် မြင်ရတော့ သူ့ဇနီးအပေါ် ထားတဲ့မေတ္တာစိတ်နဲ့ သူ့ဒေါသက အရှိန်တော့ လျော့ကျသွားတယ် ။ သူ့ကို တွေ့တွေ့ချင်း မိန်းမဖြစ်သူက..

” မောင်ရေ အချိန် နောက်ကျသွားတာ ခွင့်လွှတ်နော် ၊ မောင့်အတွက် လာပို့တဲ့ ထမင်းကို လမ်းမှာ ရှင်သာရိပုတ္တရာ မထေရ်မြတ်ကို လှူဒါန်း လိုက်တယ် ၊ အဲဒါကြောင့် နောက်တစ်ခေါက်အိမ်ပြန်ပြီး ၊ ချက်ရလို့ မောင့်အတွက် နောက်ကျမှာ စိုးလို့ အမြန်ချက်ပြီး အမြန် လာခဲ့ရတယ် ၊ မောင် ဆာနေမယ် ဆိုတာ သိပါတယ် ။ ဒီတော့ မောင်ရယ် လမ်းမှာလှူခဲ့တဲ့ ဆွမ်းကုသိုလ်ရဲ့ အဖို့ကို မောင့်အား အမျှပေးပါတယ် ” လို့ ဆိုပါတယ် ။

အဲဒီတော့ မောင်ပုဏ္ဏကလည်း စိတ်မဆိုးဘဲနဲ့ သူ့ဇနီးရဲ့သဒ္ဒါစိတ်နဲ့ သူ့အပေါ် ထားရှိတဲ့ မေတ္တာစိတ်ကို ခံစားနားလည်ပြီး ဝမ်းသာလွန်းလို့ ” ဝမ်းသာလိုက်တာ ရှင်မရယ် ၊ သာဓု.. သာဓု .. သာဓု ” လို့ ခေါ်လိုက်တယ် ။

” ဪ.. ဒါနဲ့ ရှင်မရေ ကိုယ်လည်း မနက်က အရှင်သာရိပုတ္တရာကို ရေနဲ့ဒန်ပူ လှူလိုက်သေးတယ်။ အဲဒါ ညီမကိုလည်း အမျှပေးပါတယ် ။”

” ဝမ်းသာလိုက်တာ မောင်ရယ် ။ သာဓု.. သာဓု ” ပါလို့ အသိအမှတ် ပြုလိုက်တယ် ။

ဖြစ်နိုင်မယ် ဆိုရင် မိသားစု အစုံနဲ့ ရိုရိုသေသေ လေးလေးစားစား နဲ့ စိတ်တူ ကိုယ်တူ အလှူရေစက် လက်နဲ့မကွာ ကိုယ်တိုင်ကိုယ်ကျ လှူစေချင် ပါတယ် ။ အဲဒီလို လှူတတ်မှလည်း ဖြစ်လေရာဘဝမှာ ပါရမီရှင် စုံတွဲတွေ အဖြစ် အတူတူ အကျိုးပေးကြ မှာပါ ။ ချစ်တဲ့သူနဲ့ အတူတူ ကုသိုလ်ပြုပါလို့ တိုက်တွန်းပါရစေရှင် ။ မတူတဲ့ အမြင်များကို ဆွေးနွေးဖို့ ဖိတ်ခေါ်ပါတယ်။ ကျေးဇူးတင်ပါတယ် ။

မေသင်္ကြန်ဟိန်း ( မြစ်မခ )

Add a Comment

Your email address will not be published. Required fields are marked *