ချင်းပြည်နယ် တောင်တန်းဒေသမှာ သာသနာပြုနေတဲ့ သာသနာ အာဇာနည်တို့ ရဲ့လေးစားကြည်ညိုဖွယ်ကောင်းလှသော ပုံရိပ်များ

ချင်းပြည်နယ်တောင်တန်းဒေသမှာ သာသနာပြုနေ တဲ့ သာသနာ အာဇာနည်တို့ရဲ့လေးစားကြည်ညိုဖွယ်ကောင်းလှသော ပုံရိပ်များ

မိမိ တောင်တန်းသာသနာပြုသွားရမည် ဆိုကတည်းက ခေါင်းထဲမှာ အတွေးပေါင်းစုံက မဖိတ်ခေါ်ဘဲ ဝင်ရောက်လာခဲ့သည်။မိမိတာဝန်ကျတဲ့ ရွာလေးမှာ ဝေးလံခေါင်းပါးသလို ဖုန်းလိုင်းကမမိ လမ်းပမ်းဆက်သွယ်ရေးက ခက်ခဲပြီး ကျန်းမာရေးအတွက်ဆိုရင် ကိုယ်ဆောင်ထားတဲ့ ဆေးမြီးတိုကိုသာ အားကိုးရတဲ့အခြေနေမျိုးဆိုတာ စုံစမ်းသိ လိုက်ရတော့

“ဪ ငါတစ်ယောက်ထဲ တောင်တန်းကြွရတာ မဟုတ်သလို ငါ တာဝန်ကျတဲ့ ရွာလေးပဲ အစစအရာရာ ခက်ခဲတာ မဟုတ်ဘူး တောင်တန်းသာသနာပြုတိုင်း ကိုယ်စီကိုယ်စီ အခက်အခဲတွေ အဆင်မပြေတာတွေ ရှိကြတာပဲလေ” လို့ တွေးရင်း ကိုယ့်ကိုယ်ကိုပဲ ပြန်အားပေးနေရသည်။

တောင်တန်းသာသပြုကြွရမည့် သံဃာတော်တို့အား နိုင်ငံတော်ပရိယတ္တိသာသနာ့တက္ကသိုလ်မှ ဆရာသမားများနှင့် ပစ္စည်းလေးပါး ဒါယကာ ဒါယိကာမတို့မှ ဝိုင်းဝန်းပြီး လှူဒါန်းထောက်ပံပေးကြသဖြင့် သာသနာပြုကြွမည့် သံဃာတော်လေးများအတွက် ခွန်အားတစ်ရပ်ဖြစ်ခဲ့ရပါသည်။ထို့ပြင် မိမိ၏ မိဘဆရာသမားများ ဆွေမျိုးသားချင်း မိတ်ဆွေသူငယ်ချင်းများနှင့် ပစ္စည်းလေးပါး ဒါယကာ ဒါယိကာမများ တို့မှလည်း သာသနာပြုကြွရောက်မည့် မိမိအတွက် တတ်စွမ်းသ၍ လှူဒါန်းထောက်ပံ့ပေးကြပြန်ပါသေးသည်။

ဤသည်မှာလည်း မိမိအတွက် ခွန်အားတစ်ရပ် ဖြစ်ခဲ့ရပြန်ပါသည်။မိမိတာဝန်ကျသည့်ရွာလေးသည်ကား ချင်းပြည်နယ်တောင်ပိုင်း ကန်ပက်လက်မြို့နယ်အဆုံး ရခိုင်ပြည်နယ် မင်းပြားမြို့နယ်အစပ်က အစွန်ဆုံးရွာလေးဖြစ်သည်။ကန်ပက်လက်ကနေ ရှင်စောရွာလေးအထိ ဆိုင်ကယ်ခရီးဖြင့် ၆နာရီ ရနာရီခန့် ခရီးဆက်ရသည်ဟု ကြားသိထားရလေတော့ သားသမီးတွေအတွက်ဆို လွန်လွန်ကဲကဲ စိတ်ပူတတ်တဲ့ အဖေနဲ့ အမေ့ကိုတော့ ဒီအကြောင်းတွေ ပြောမပြခဲ့ပေ။

အစစအရာရာ အဆင်ပြေပါတယ် လို့သာ မိဘစိတ်ချမ်းသာအောင် ညာပြောခဲ့ရသည်။ဒီလိုနဲ့ တောင်တန်းသွားရမည့်ရက် ရောက်လာတော့ မန္တလေး နိုင်ငံတော်ပရိယတ္တိသာသနာ့တက္ကသိုလ်ကနေ ချင်းပြည်နယ်ကို တာဝန်ကိုယ်စီကျတဲ့ သူငယ်ချင်းများနှင့်အတူ ချင်းတောင်တန်း ကန်ပက်လက်မြို့လေးဆီသို့ ခရီးနှင်လာခဲ့ကြသည်။ချင်းတောင်တန်းကို ရောက်တယ်ဆိုရင်ပဲ ရောက်ရောက်ချင်း ဆောက်နဲ့ထွင်းဆိုသလို သူငယ်ချင်းဆိုင်ကယ်နောက် လိုက်စီးရင်း ဆိုင်ကယ်မှောက်ကာ နှစ်ယောက်သား မြေပြင်ပေါ်၌ လွင့်စင်သွားလေသည်။

ကံကောင်းထောက်မလို့သာ ဆိုင်ကယ်မောင်းသူ သူငယ်ချင်း မှာ ဒဏ်ရာကြီးကြီးမားမား မရခဲ့သလို ဆိုင်ကယ်ဦးထုပ် မပါသည့်ကိုယ့်မှာလည်း ခေါင်းမကွဲခဲ့ရလေသည်။ထို့ပြင် မြေပြန့်ဒေသနှင့် အလွန်ကွာခြားလှသည့် တောင်ပေါ်ရာသီဥတုရဲ့ အအေးဒဏ်က အနွေးထည်ပါးပါးလေးနှင့် ခြုံထည်ပါးပါးလေးသာပါလာသည့် မိမိကို ကျီစယ်လေတော့သည်။ ချမ်းအေး လွန်းပြီး မြူနှင်းမြူခိုးများဖြင့် အဆက် မပြတ် မှိုင်းတိုက်နေသည့် ရာသီဥတုရဲ့ ကျီစယ်မှုကြောင့် နေမကောင်းဖြစ်ပြီး ဆေးတောင်ထိုးလိုက်ရသည်။

နောက်တစ်နေ့တွင် ကန်ပက်လက်မြို့လေးကို ရောက်သည်နှင့် ခေါ်နူးစုမ်ဝိတိုရိယတော်ပေါ်သို့ တက်ရောက်ကာ စိမ်းလန်းစိုပြေသည့် သဘာဝအလှရှုခင်းများ၊ တိမ်ပင်လယ်တွေနှင့် ပန်ချီးကားသဖွယ် ကဗျာဆန်နေသည့် တောင်တန်းစိမ်းစိမ်းကြီးတွေရဲ့အလှတရားကို တဝကြီး ရှုမျှော် ခံစားရလေသည်။ထို့နောက် ကန်ပ က်လက်မြို့ ဗဟိုဆရာတော် ထံနှင့် သာသနာရေးရုံးသို့ Duty Report တင်ပြီး တာဝန်ကျရာ ရှင်စောရွာလေးဆီကို ဆက်၍ခရီးနှင်ရပြန်သည်။

လမ်းခရီးကကြမ်းတော့ ကျင်ဒွေး ဘက်ကို လိုင်းကားများလည်း မပြေးဆွဲသေးသလို ကိုယ်ကိုယ်တိုင်လည်း ဆိုင်ကယ်ကမစီးတတ်သေးသဖြင့် ကုန်ပစ္စည်းတင်သည့် ford ကားနဲ့ ကျင်ဒွေးအထိ လမ်းကြုံ လိုက်သွားရသည်။လမ်းအခြေနေက အစာကြေရင်ချောင်ပြီး ford ကားစီးရတာတောင် မြင်းစီးနေရသည့်နှယ် ခုန်ဆွခုန် ဆွဖြစ်နေသည်။ ကားဆရာကို ဘယ်လောက်ဝေး လဲမေးကြည့်တော့ “ကျင်ဒွေးကို ညနေမှ ရောက်မယ် ဦးဇင်းရေ” တဲ့။

သူ့စကားကြားလိုက် ရတာ ကိုယ်အတော်အားရှိသွားသည်။ သူပြောတာမှန်ပါသည် ကန်ပက်လက်ကနေ မနက် ၈ နာရီလောက်က ထွက်လာတာ ကုန်တင်ကုန်ချနဲ့ဆိုတော့ ညနေ ၅ နာရီလောက်မှ ကျင်ဒွေးကို ရောက်သည်။ကျင်ဒွေးရောက်တော့ လူသာပြုက မိမိကိုလာတွေ့ပြီး “ဘုန်းဘုန်းရေ ရှင်စောရောက်ဖို့က နောက်ထပ် ၂ နာရီလောက်မောင်းရေ သးတာမို့ ဒီနေ့တော့ သွားဖို့ အချိန်မမီတော့ဘူး မနက်ဖန်မှ ဆက်သွားရအောင်ဘုရာ့”…လို့ လျှောက်လေ သည်။

သို့ပေမယ့် အားရှိစရာတစ်ခုမှာ နေ့တစ်နေ့၌ ညီအစ်ကိုရင်းပမာနောင်တော်များဖြစ်သည့် ခြုံဆရာတော် ရွှေတွင်းတူးဆရာတော် လွန်ဒုံဆရာတော် ဟုတ်ဖုံကျင်းဆရာတော် ရှီးနှော့ကျင်းဆရာတော် အောက်ကန့်ဆရာတော် နှင့် လွှာဆရာတော်…စတဲ့ ချင်းတောင်တန်းသာသနာပြုနောင်တော်များက မိမိတာဝန်ကျရာ ရှင်စောရွာလေး အထိ လိုက်ပါပို့ဆောင်ပေးကြရှာသည်။နောင်တော်များပြန်သွားပြီးနောက်ပိုင်း ကိုယ်ကလည်း ရောက်စဆိုတော့ ရွာသူရွာသားများနှင့် ရင်းနီးမှုမရသေးသည်ကတစ်ကြောင်း ဖုန်းလိုင်းမမိ၍ ဘယ်နှင့်မှ အဆက်အသွယ်လုပ်လို့ မရသည်ကတစ်ကြောင်း သွေးမတော်သားမစပ် ဘာသာ စကားခြားနားသည့်သူများကြား တစ်ယောက်ထဲနေရ မည့် ကိုယ့်အဖြစ်ကိုတွေးရင်း ငိုချင် စိတ်တောင်ပေါက်မိလေသည်။

တစ်ယောက်ထဲ ငူတူတူငိုင်တိုင်တိုင်ထိုင်ပြီး ဟိုကြည့်ဒီကြည့် တောင်တွေးမြောက်တွေးရင်း အရပ်လေးမျက်နှာ ဘယ်ကိုပဲကြည့်ကြည့် တောင်တန်းကြီးတွေသာ မြင်နေရလေတော့ ဝမ်းနည်သလိုလို လွမ်းဆွေးသလိုလိုဖြစ်လာသည်။ “ဒီ၂နှစ်အတွင်း အမေ့သား မရူး ရင်တော့ ဒီတစ်သက် မရူးတော့ဘူး အမေရေ လို့သာ ဟာသအဖြစ် တစ်ခါတစ်လေ ရေရွတ်မိလေတော့ သည်။ ဆက်ရန်ရှိသေးသည်…ရှင်စော ၂၇-၆-၂၀၂၀ စာသားမှာ တောင်တန်းသာသနာပြု ဆရာတော်တစ်ပါး က ရေးသားထားတာဖြစ်ပြီး ပုံများမှာ ချင်းပြည်နယ်အတွင်း သာသနာပြုနေကြတဲ့ ဆရာတော်များ ၏ ပုံများဖြစ်ပါသည်။

အရှင်နာဂဝံသ(ပရဟိတပန်းခင်းဆရာတော်)

ချင်းတောင်တန်းသာသနာပြု

သာသနတက်ကသီလဓမ်မာစရိယ

(B.A Buddhism)

ချင်းပြည်နယ် (တောင်ပိုင်း) မင်းတပ်မြို့နယ်

ခြုံရွာ ထေရဝါဒသာသနာပြုကျောင်း

09452452665 5/မရန(သ)007289

Add a Comment

Your email address will not be published. Required fields are marked *